2 Kronieken 19
01Josafat, keunenk van Juda, keerde zond en wel noar zien pelaais in Jeruzalem weerom.
02Profeet Jehu, zeun van Chanani, ging keunenk in de muit en zee tegen hom: "Mos ie nou zo neudeg n goddeloze helpen en groot wezen mit heur dij de HEER hoaten? Doarom is de HEER vergrèld op joe!
03Toch is ter ook wel wat gouds van joe te zeggen: ie hebben de wijde poalen in t laand verbraand en joe mit joen haile haart noar God richt."
04Josafat bleef in Jeruzalem wonen. Hai trok ter vannijs op oet maank t volk, van Berseba òf aan tot de baargen van Efraïm tou. Hai wol heur weeromkeren loaten tot de HEER, de God van heur veurolders.
05Hai stelde rechters aan in t laand, in ale vestingsteden van Juda, de ain noa de aander.
06Hai zee tegen dij rechters: "Ie mouten goud waiten wat ie doun, want ie holden gain rechtsproak oet noam van mensken, mor oet noam van de HEER, ons God. Dij is in t rechtsgeding bie joe aanwezeg.
07Heb ontzag veur de HEER, goa sekuur te waark, want de HEER, ons God, kin gain onrecht velen, gain veurtrekkerij en ook gain omkoperij."
08Ook in Jeruzalem stelde Josafat gounent van de Levieten, priesters en femilie-oldsten van Israël aan om recht te spreken oet noam van de HEER, ook in kwezzies tussen börgers van Jeruzalem.
09Hai druig heur op: "Dou joen waark in ontzag veur de HEER, mit n oprecht haart en n eerlek gewaiten.
10 Ieder bòt as joen amtgenoten oet aander steden bie joe aankommen mit kwezzies over moord en doodslag of over oetleg van wetten, geboden, regels en veurschriften, mout ie heur woarschaauwen dat zai zok nait schuldeg moaken mouten tegenover de HEER. Der zol ja n vergrèldhaid over joe en heur lösbarsten kinnen. As ie t goud doun, komt joe der niks van over.
11 Hogepriester Amarja is boven joe aansteld veur ale kwezzies dij de HEER aanbelangen, en Zebadja, zeun van Jismaël, dij stamhoofd van t hoes van Juda is, staait boven joe veur ale kwezzies dij de keunenk aangoan. Levieten stoan tot joen dainst as amtenoars. Goa vastberoaden aan t waark; de HEER staait aan zied van n rechtveerdege."
|
